Fariz Nəcəfov: “Azarkeş probleminin həllində köməyinizə ehtiyacımız var”

Qəbələdə eyniadlı klubun təşkilatçılığı ilə rayon ziyalıları və veteran futbolçularla keçirilən görüşdə “Qəbələ”nin vitse-prezidenti Fariz Nəcəfov çıxış edib. Futbolxeber.az saytının məlumatına görə, ictimaiyyətlə əlaqələrin klubun həyatında önəmli yer tutduğunu söyləyən Nəcəfov klubun azarkeşlərə ehtiyac duyduğunu deyib və ziyalıları, futbol veteranlarını “Qəbələ”nin ətrafında daha sıx birləşməyə çağırıb: “Qarşısına böyük klub olmağı hədəf qoyan bir komanda üçün azarkeş faktoru ən vacib məsələdir. Bu mənada problem yaşadığımız heç birinizə sirr deyil. Azarkeş probleminin həllində köməyinizə ehtiyacımız var. Bu səbəbdən əməyimizi, gücümüzü birləşdirməliyik. Futbol veteranlarımız gənc yaşlarında regionda futbolun inkişafına çalışıblar. İndi isə “Qəbələ”nin oyunlarına gəlməklə dəstəklərini əsirgəmirlər. Biz onların səylərini dəyərləndiririk. Stadionumuzda onlar üçün xüsusi yerlər ayrılacaq ki, oyunları rahat şəkildə izləyə bilsinlər. Biz bu gün veteran futbolçulara dəyər verməliyik. Gənc futbolçularımız da bu duruma şahidlik edərək gələcəkləri barədə əminlik və rahatlıq duymalıdırlar”.