“Bakı”nın baş məşqçisindən hakimlərə sərt etiraz: “Bezmişik artıq”

“Bakı”nın baş məşqçisi Novruz Əzimov I divizionun 16-cı turunda “Qaradağ-Lökbatan”a qarşı keçirdikləri oyunun (0:2) hakimlərindən narazı qalıb. Futbolxeber.az saytının məlumatına görə, matçın gedişində ədalət qoruyucularının qərarlarından narazı qalan Novruz Əzimov oyunun sonuna yaxın etirazını sərt şəkildə bildirib. Belə ki, ehtiyat oyunçular skamyasından birbaşa VIP lojaya qalxan təcrübəli mütəxəssis üzünü görüşün hakim-insprektoru Əlibala Ələsgərova tutaraq deyib: “Bu qədər səhv olar? Hakimlərin məqsədi bizi uduzdurmaqdı? Gözümün qarşısında yan xətt hakimi bayrağını qaldırır ki, top auta çıxıb. Halbuki top oyundaydı. Oyunçumuz qapıçı ilə təkbətək çıxır, hakim yenə bayrağını qaldırır və ofsayt deyir. Amma ofsaytdan söhbət belə gedə bilməzdi. Bezmişik artıq. Hər oyunda hakim səhvləri olur. Demirəm ki, kömək etsinlər bizə. Qoy, ədalətli idarəçilik olsun. “Bakı”nın problemləri onsuz da kifayət qədərdi. Bir tərəfdən də hakimlər bizi sıxırlar”.

Xatırladaq ki, “Bakı”nın oyununda baş hakim Ramil Əhmədov olub. Novruz Əzimovun narazı qaldığı yan xətt hakimi isə Munis Abdullayev idi.