Aqil Məmmədov: “Bu qədər asanlıqla qırmızı vərəqə vermək olmaz”

“Neftçi”nin qapıçısı Aqil Məmmədov Futbolxeber.az saytına müsahibə verib.

- Premyer Liqanın XXIII turunda “Zirə”yə 0:3 hesabı ilə məğlub oldunuz. Qarşılaşma haqda nə deyə bilərsən?

- Oyuna yaxşı başlamışdıq. Lakin qırmızı vərəqədən sonra oyun təmiz “sındı”. Ona qədər üstünlük bizdə idi. Heç nədən azlıqda qaldıq. Yekunda da böyükhesabla uduzduq.

- Hakimin qırmızı vərəqə qərarı ilə razı deyilsən?

- Bu qədər asanlıqla qırmızı vərəqə vermək olmaz. Fariz Yusifova böyük hörmətimiz var. Amma belə oyunda elə asanlıqla qırmızı vərəqə verməzlər.

- Necə düşünürsən, “Zirə”nin vurduğu ikinci qolda sənin səhvin var idi, yoxsa müdafiəçilərin?

- Qapıdan qol keçibsə, hamımız günahkarıq. Zərbə gözlədiyim deyi, əks tərəfə getdi. Ona görə də çaşqınlıq yarandı.

- “Zirə”yə belə hesabla uduzacağınızı gözləyirdiz?

- Bura qələbə üçün gəlmişdik. Təbii ki, belə məğlubiyyət gözlənilməz oldu. Bunu da qırmızı vərəqə ilə əlaqələndirərdim. Azlıqda qaldıqdan sonra oyunumuz “sındı”. Mənasız yerə azlıqda qaldıq.  

- “Zirə”yə qarşı keçirdiyiniz 3 oyunda cəmi 1 xal qazanmısız. Bunun səbəbi nədir?

- “Zirə” yaxşı komandadı. Hazırda Premyer Liqada 2-3 yaxşı futbol oynayan komandalardan biridirlər. Qələbə münasibəti ilə rəqibi təbrik edirəm.

- Belə məğlubiyyətdən sonra toparlanmaq üçün ilk növbədə nə lazımdı?

- Əvvəlcə bu məğlubiyyəti unutmalıyıq. Sonra yaxşı hazırlıq keçib, diqqətimizi qarşıdakı görüşlərə yönəltməliyik. Növbəti oyunda “Xəzər Lənkəran”la qarşılaşacağıq. Kubok oyunundan sonra isə çempionatda “Qəbələ” ilə üz-üzə gələcəyik. Hazırda bu oyunları düşünmək lazımdı.

- Hazırda “Neftçi” liderlər qrupundan aralı düşüb. Fərqin çoxalması sizi narahat etmir?

- Qarşıda hələ 13 tur var. Dəyişib, yaxşı oynamaq lazımdı. Psixoloji gərginlikdən çıxmaq lazımdı.