“Qəbələ”nin U-11 komandası “Mets”ə qalib gəldi

“Qəbələ” Futbol Akademiyasının komandaları Qətərdə keçirilən “Aspire Tri Series” beynəlxalq turnirdə mübarizəyə başlayıb. Futbolxeber.az-ın məlumatına görə, 3 klubun üç müxtəlif yaş qrupundan olan komandalarının mübarizə apardığı yarışın ilk turunda istirahət edən “qırmızı-qaralar” bu gün Fransa “Mets”i ilə üz-üzə gəlib. U-10 komandalarının oyununda Fransa təmsilçisi qalib gəlib - 3:1. “Qəbələ”nin yeganə qoluna İlkin Muradov imza atıb.

U-11-lərin qarşılaşması isə “qırmızı-qaralar”ın qələbəsi ilə nəticələnib - 5:4. Okan Təhməzlinin pokerə imza atdığı oyunda digər qolumuzun müəllifi Elvin Qarayev olub.

U-12-lərin mübarizəsində isə “Mets” üstün olub - 7:1. Fransalıların qapısından qolu Emil Süleymanov keçirib. Təmsilçilərimiz sabah yarışın təşkilatçısı olan “Aspire” akademiyasından olan həmyaşıdları ilə görüşəcək. Oyunların hər üçü yerli vaxtla saat 17:00-da (Bakı vaxtı ilə 18:00-da) başlayacaq.

Qeyd edək ki, ilk turda “Aspire” ilə “Mets” qarşılaşıb. Meydan sahibləri U-10-ların oyununda 4:1, U-11-lərin mübarizəsində 2:1 hesabı ilə qalib gəlib, U-12-lərin görüşündə heç-heçə qeydə alınıb - 1:1.