“Xəzər Lənkəran” “Qəbələ” ilə oyuna tam heyətlə hazırlaşır

“Xəzər Lənkəran” bir günlük istirahətdən sonra bu gün, XXIII turun hazırlığına başlayır. Futbolxeber.az-ın məlumatına görə, qış fasiləsindən sonra keçirdiyi son iki qarşılaşmada məğlub olan komanda bu dəfə çətin Qəbələ səfərinə yollanacaq. Fevral ayının 26-na qədər Lənkərandakı bazasında məşqlərini davam etdirəcək “Xəzər Lənkəran” həmin gün səfərə çıxacaq və bir gün sonra Qəbələdə eyni adlı komanda ilə üz-üzə gələcək. Komandada zədəli və cəzalı futbolçunun  olmaması məşqçilər korpusunu sevindirən əsas məqamdır (klub saytı).