Andrey Popoviç: “Bəli, “Kəpəz”lə oyunda səhvlərim oldu və buna görə çox məyusam”

“Qəbələ”nin qapıçısı Andrey Popoviç Futbolxeber.az saytına müsahibə verib.

- Antalya toplanışı necə keçdi?

- Təlim-məşq toplanışı yaxşı keçdi. Gündəlik məşqlər etdik. Yoxlama oyunlarında gücümüzü sınadıq. Hazırlıq prosesinin yaxşı alındığını söyləyə bilərəm.

- Amma III dövrənin ilk turunda “Kəpəz”ə uduzduz...

- Oyun haqda nə deyim? Məğlub olduq və bu, çox pis haldı. Yaxşı oynamadığımızı düşünürəm.

- Məğlubiyyətin səbəbini nədə görürsən?

- Konkret səbəb göstərmək çətindi. Bir tərəfdən oyunumuza meydançanın durumu təsir göstərdi. Digər tərəfdən də komanda olaraq pis oynadıq.

- Çoxları məğlubiyyətdə sənin böyük “pay”ın olduğunu deyir. Razısan bununla?

- Səhvlərim oldu, bununla razıyam. Bu cür səhvlər buraxdığım üçün özüm də çox məyusam. Mən də istəməzdim ki. belə olsun. Komandama daim kömək etməyi arzulayıram.

- Həm ikinci, həm də üçüncü qolda səhv etdiyini qəbul edirsən?

- Çoxlarının məni tənqid etdiyini bilirəm. Danmıram, səhvlərim oldu. Özüm də bu haqda düşünürəm. Yenə deyirəm, etdiyim səhvlərə görə çox məyusam.

- Səhvlərin səbəbini nədə görürsən?

- Bu suala dəqiq cavab verə bilməyəcəm. Çünki niyə belə alındığını bilmirəm. Amma futbolda bəzən belə uğursuzluqlarla üzləşirsən. Çox məyusam.

- “Kəpəz”lə oyunda buraxdığın səhvlər növbəti görüşlərdə üzərində təzyiq yaratmayacaq ki?

- Ümid edirəm ki. belə olmayacaq. Hazırkı məqamda əsas olan səhvlərdən nəticə çıxarmaqdı. Ümid edirəm ki, bir də belə hal təkrarlanmayacaq.