“Azərbaycanla oyunda qapıçımız bizə çox kömək etdi”

Valentin Qranatkinin xatirəsinə həsr olunmuş beynəlxalq turnirin üçüncü turunda 17 yaşadək futbolçulardan ibarət milli komandamız Sloveniyaya 0:4 hesabı ilə məğlub olub. Futbolxeber.az-ın Sankt-Peterburqa ezam olunmuş əməkdaşının verdiyi məlumata görə, Sloveniuyanın baş məşqçisi İqor Benedejçiç matçdan sonra keçirilən mətbuat konfransında bunları deyib: “Çox texnikalı rəqibə qarşı oynadıq. Birinci hissədə 2 qol vurduq. Azərbaycan millisinin də fərqlənmək üçün şansları oldu. Amma onlar əllərinə düşən şanslardan yararlana bilmədilər. Həm də biz ilk yarıda iki qol vuraraq, böyük üstünlük qazanmışdıq. Bu səbəbdən də ikinci yarıda daha rahat çıxış etdik. Qapıçımızın oyununu qeyd etmək istərdim. O bir neçə epizodda inamlı oynadı. Əminliklə deyə bilərəm ki, bu gün qapıçımız bizə çox kömək etdi”.