Elnur Məmmədov: “İstanbulda 5 məşqçi ilə görüşmüşdük”

“Klub rəhbərliyi bizə legioner məşqçi tapmağı tapşırmışdı. Biz də bu yöndə əlimizdən gələni etdik Vəli Qasımovla birlikdə İstanbulda 2 gün ərzində 5 məşqçi ilə görüşdük. Lakin onların adlarını açıqlaya bilmərəm”. Futbolxeber.az saytına müsahibəsində bu sözləri “Neftçi”nin icraçı direktoru Elnur Məmmədov deyib.

Klub rəsmisi Əsgər Abdullayevin baş məşqçi postunda saxlanılmasının səbəbini belə izah edib: “Görüşdüyümüz məşqçilərin hər birinə də bildirmişdik ki, biz yerli futbolçuların inkişaf etdirilməsini istəyirik. Müşahidə Şurasına dünənki iclasında da Əsgər Abdullayevin geridə qalan müddətdəki fəaliyyəti barədə fikir mübadiləsi aparıldı. O, komandanı çətin bir dönəmdə götürmüşdü. Onun hesabatı dinlənildi, göstərdiyi nəticələr təhlil olundu. Yekunda da qərara gəldik ki, yolumuza elə Əsgər Abdullayevlə davam edək”.

“Əsgər Abdullayevla bağlı qəbul olunan qərarda devalovasiyanın nə dərəcədə rolu oldu? Çünki komandaya əcnəbi məşqçi gəlsəydi, bu, əlavə xərc olacaqdı” sualını Məmmədov belə cavablandırıb: “Dünənki iclasda da bu barədə danışdıq. Yeni məşqçi gətirsəydik, onun köməkçiləri, əlavə istəkləri olacaqdı. Bütün bunlar da xərcdir. Devalvasiya olan gündən büdcəmizi müzakirə edirik. Bununla bağlı dünənki iclasda da söhbətimiz oldu. Elə bugunkü yığıncaqdan sonra da bir sıra görüşlərimiz nəzərdə tutulub ki, bu problemi necə optimallaşdıraq. Hansısa futbolçunun bu səbəbdən komandadan ayrılıb-ayrılmayacağı ilə bağlı hələlik heç nə deyə bilməyəcəm”.