Sergey Zenyov: “Qol vurmursansa, qələbə də qazana bilməzsən”

“Nə demək olar? 3 qol buraxdıq və məğlub olduq. Nə deyəcəyimi bilmirəm”. Futbolxeber.az-ın məlumatına görə, bu sözlər “Qəbələ”nin futbolçusu Sergey Zenyova məxsusdu.

Avropa Liqasının qrup mərhələsinin son qarşılaşmasında öz meydanında “Krasnodar”la qarşılaşan “qırmızı-qaralar” 0:3 hesablı məğlubiyyətlə üzləşdilər. Oyundan sonra jurnalistlərin suallarını cavablandıran estoniyalı hücumçu məğlubiyyətə belə şərh verib.

 “Alınmadı. Əgər niyə alınmadığını bilsəydim, nəyisə dəyişməyə cəhd edərdim. Özümüzə inanırdıq, istəyirdik ki, qələbə qazanaq, ancaq... Əsas problemlərdən biri də əldə etdiyimiz şansları reallaşdıra bilməməyimizdi. Əgər qol vurmursansa, qələbə də qazana bilməzsən. Hələlik bu vəziyyətdən çıxış yolu axtarırıq. Nəsə bir çarəsini tapmalıyıq. Bəlkə də ən optimal variant hücumçuları dəyişməkdi. Təkcə Antonovu nəzərdə tutmuram. Komandanın bütün oyunçuları qol vura bilər” - deyə, Zenyov bildirib.

O, matç ərzində kobud səhvlərə yol verən qapıçı Andrey Popoviçə dəstəyini nümayiş etdirib: “Buraxılan qolda təkcə qapıçı günahkar olmur, bütün komanda bunda məsuliyyət daşıyır. Popoviçi bu qədər tənqid etmək düz deyil. Hamımız səhv edirik. Biz qol vura bilmirik, o isə qol buraxır. Məsələn, mən qol vurmağa borcluyam, əgər vəzifəmin öhdəsindən gələ bilməmişəmsə, necə onu səhv etməkdə günahlandıra bilərəm?”

Mənbə: apasport.az