AFFA-dan “Bakı” rəsmisinə 5 oyunluq cəza: “Mən heç kimi təhqir etməmişəm”

Bu gün AFFA İntizam Komitəsinin iclası keçirilib. Futbolxeber.az-ın məlumatına görə, 3 dekabr 2015-ci il, 2015/2016 mövsümündə, XXIV Azərbaycan Kubokunun 1/8 mərhələsinin “Rəvan” - “Bakı” matçı başa çatdıqdan sonra “Bakı” klubunun  rəsmisi Vüqar Əliyev hakimlər briqadasını təhqir etdiyinə görə 5 oyunluq cəzalanıb, klub 500 manat cərimə olunub.

Məsələ ilə bağlı Futbolxeber.az saytına açıqlama verən Vüqar Əliyev günahsız olduğunu bildirib: “AFFA-nın qərarına hörmətlə yanaşıram. Lakin mən heç kimi təhqir etməmişəm. Cəza artıq verilib. Nə deyim ki? Nəinki oyundan sonra, ümumiyyətlə heç oyun vaxtı da təhqirə yol verməmişəm. Bəli, hakimlərə narazılığımızı bildirmişik. Bu da matçın sonuna vaxtın artırılmaması ilə bağlı idi. Ancaq hər hansı bir təhqirdən söhbət gedə bilməz”.