“Zirə”dən açıqlama: komanda niyə “Neftçi” ilə oyuna dəbilqəsiz çıxıb?

Dekabrın 4-də Azərbaycan Respublikası Dövlət Neft Şirkətinin (SOCAR) “Günəşli” yatağında güclü yanğının baş verməsi ilə əlaqədar faciəyə futbol klublarımız da biganə qalmayıblar. Futbolxeber.az-ın məlumatına görə, mərhum neftçilərin xatirəsinə ehtiram əlaməti olaraq, ölkə çempionatında dünən baş tutan görüşlərə qara sarğı ilə çıxıblar. 3 klub - “Neftçi”, “Xəzər Lənkəran” və “Qəbələ”nin futbolçuları daha bir nümunəvi addım ataraq, meydana əllərində və ya başlarında neftçi dəbilqəsi ilə ayaq basıblar. “Qarabağ” və “Inter” belə addım atmadığı halda, “Neftçi” ilə üz-üzə gələn “Zirə” də meydana dəbilqəsiz çıxıb.

“Zirə”nin mətbuat xidmətinin rəhbəri Elman Himayətoğlu Futbolxeber.az saytına açıqlamasında “Neftçi”dən fərqli addım atmalarının səbəbini belə izah edib: “Bizə yalnız qara sarğıla çıxmalı olduğumuzu demişdilər. Belə bir ideya olduğunu bilsəydik, təbii ki, biz də dəbilqəylə çıxardıq. Hətta qara sarğıla çıxacağımız da oyundan bir neçə saat əvvəl məlum oldu. Komandamız meydana qara sarğıyla çıxdı və oyundan öncə də bir dəqiqəlik sükut oldu. Bu, hamımız üçün böyük faciədi. Bir daha dünyasını dəyişənlərə Allahdan rəhmət, ailelerinə də səbr diləyirik”.