Qay: “Son turda olsa belə, Avroliqanın qrup mərhələsində qələbə qazanmaq istəyirik”

“Qəbələ”nin məqsədi Avroliqada daha da irəliləmək idi. Ona görə də hazırkı nəticədən razı qala bilmərəm. Ümumi götürdükdə, PAOK-la oyunun nəticəsini yaxşı hesab etmək olar”. Futbolxeber.az saytına müsahibəsində bu sözləri “Qəbələ”nin aparıcı üzvü Aleksey Qay deyib.

Ukraynalı futbolçu Avroliqanın qrup mərhələsinin beşinci turu çərçivəsində PAOK-a qalib gələ bilməmələrinin (0:0) səbəbini belə izah edib: “Futboldu, hər şey olur. Qələbə qazanmaq üçün şanslarımız var idi. Yunanıstandan qələbə ilə ayrıla bilərdik. Ancaq ələ düşən qol imkanlarından yararlana bilmədik”.

Qay qrup mərhələsinin son turunda “Krasnodar”la oyuna qələbə üçün çıxacaqlarını qeyd edib: “Qrupdan çıxmaq şansımız qalmayıb. Amma biz həmişəki kimi optimistik. “Krasnodar”la görüşdə əldə edəcəyimiz 3 xal heç nəyi dəyişməyəcək. Amma son turda olsa belə, Avroliqanın qrup mərhələsində qələbə qazanmaq istəyirik”.

Ukraynalı yarımmüdafiəçi bazar etsəi Premyer Liqanın XIV turu çərçivəsində “Rəvan”a qarşı keçirəcəkləri oyuna da toxunub: “PAOK-la oyundan sonra komandada yorğunluq var. "Rəvan"la matça hazırlaşacağıq və yalnız qələbəyə oynayacağıq. Bunun öhdəsindən gələcəyimizə inanıram. Komandamıza inamım böyükdü”.