“Komandamız futbol oynaya bilir”

“Uşaqlar bu gün nəyə qadir olduqlarını göstərdilər.  Komandamız xarakter nümayiş etdirdi”. Futbolxeber.az-ın məlumatına görə, bu sözləri 21 yaşadək futbolçulardan ibarət milli komandamızın baş məşqçisi Yaşar Vahabzadə deyib.

Təcrübəli mütəxəssis Avropa çempionatının seçmə mərhələsi çərçivəsində Rusiyanı 3:0 hesabı ilə məğlub etdikləri oyun haqda bunları söyləyib: “Bu gün qeydə alınan hesab da göstərir ki, komandamız futbol oynaya bilir. Futbolçularımız hər oyunda xarakter göstərsələr, nəticə qazanmaq mümkündü. Əsas özlərinə inanmalarıdır. Biz Almaniya ilə oyunda da bugünki sistemdən istifadə etdik və pis alınmadı”.

“Sizcə Rusiya millisi bu gün zəif oynadı, yoxsa yığmamız güclü idi” sualını Vahabzadə belə cavablandırıb: “Bu sualı mən də sizə vermək istərdim (gülür). Dediyim kimi, bu gün komandamız xarakter nümayiş etdirdi. Ruslardan daha yaxşı oynadıq və onlardan üstün olduq”