Nazim Süleymanov: “Futbolçunun fikri meydanda olmalıdı, başqa yerdə yox”

“Çox pis oynadıq. Hesab da bunu deyir. İlk yarıda hesab açılmasa da, rəqibin 2-3 qol şansı var idi. Komandamın oyun nizam-intizamı məni narahat edir”. Futbolxeber.az-ın məlumatına görə, bu sözləri U-19 millimizin baş məşqçisi Nazim Süleymanov Avropa çempionatının seçmə mərhələsində Ukraynaya 0:4 hesabı ilə uduzduqları görüşdən sonra deyib.

Təcrübəli mütəxəssis bildirib ki, komandası bu oyunlar mərhələ adlaya bilməz: “Belə oyunla qrupdan çıxmaq çətindi. Amma bu, 3 oyunluq turnirdi. Qarşıda hələ 2 oyunumuz var. Tələsmək lazm deyil. Bu gün buraxdığımız qolları görünüz. İkinci hissədə oyun nizam-intizamını əldən verdik. Arxaya çox oynayırlar. Futbolu geriyə yox, irəliyə oynamaq lazımdı. Meydana 2 dayaq yarmmüdafiəçisi buraxmışıq, onlar da gəlir müdafiəçilərin yanına. Biz tapşırığı veririksə, futbolçu bunu yerinə yetirməlidir. Futbolçunun fikri meydanda olmalıdı, başqa yerdə yox. Futbol ağıl oyunudu. Kim ağıllıdırsa, o da yaxşı oynayır”.

Süleymanov hücumçu problemi yaşadıqlarını bildirib: “Hücumçularımızdan İlkin Sadıqov zədəlidi. Qara Qarayev də həmçinin. Futbolçu peşəkar olmalıdı. Seçmə mərhələyə 1 il ərzində hazırlaşmaq lazımdı. Bəzi oyunçular daxildən buna hazır deyillər. Qara Qarayev “Malaqa”da oynayır. Amma həftədə cəmi 2 dəfə məşq edir. Bura gəlib, deyir ki ayağım ağrıyır, çıxır məşqə zədələnir”.

Nazim Süleymanov yenilgiyə görə azarkeşlərdən üzr istəyib: “Öz adımdan, komandamın adından futbolsevərlərdən üzr istəyirəm. Uduzmaq olar. Sadəcə, mübarizə aparmaq azımdı. Futbol sərt oyundu”.