“Xəzər Lənkəran”da ciddi itki

Premyer liqanın XI turunda səfərdə minimal hesabla qalib gələn “ Xəzər Lənkəran” sabah toplanır. Futbolxeber.az-ın klubun rəsmi saytına istinadən verdiyi məlumata görə, Lənkəran təmsilçisi “Rəvan” üzərindəki qələbədən sonra iki günlük istirahəti başa vurub, Lənkəranda məşqlərinə start verəcək. Bu arada son matçda zədələnərək oyunu erkən tərk edən Adrian Skarlatakenin durumu bəlli olub. Təcrübəli futbolçu sol ayağın diz nahiyəsi arxa bağlarının qopması ilkin diaqnozu ilə iki aylıq sıradan çıxıb. Belədə son həftə ərzində Orxan Əliyevdən sonra ikinci futbolçu əməliyyat olunacaq. Uzun müddətdir zədədən əziyyət çəkən Rasim Ramaldanovdan isə xoş xəbər var. Futbolçu sabahdan etibarən fərdi məşqlərə başlayacaq.

Xatırladaq ki, “Xəzər Lənkəran” növbəti tur çərçivəsində noyabrın 8-i saat 16.00-da “Qarabağ”la doğma meydanında qarşılaşacaq.