Rəşad Eyyubov: “Məni indi “Xəzər Lənkəran” yox, “Kəpəz” maraqlandırır”

“Kəpəz”in futbolçusu Rəşad Eyyubov Futbolxeber.az saytına müsahibə verib.

- Premyer Liqanın IX turunda “Xəzər Lənkəran”ın üzərində 1:0 hesablı qələbə qazandınız. Görüşlə bağlı nə deyə bilərsən?

- Çətin oyun oldu. Biz meydana qələbə üçün çıxmışdıq. Maksimum gücümüzü ortaya qoyduq. “Xəzər Lənkəran” da pis oynamadı. Lakin yekunda biz istəyimizə çatdıq və 3 xal qazandıq.

- Sabiq komandana qarşı oynamaq necə hiss idi?

- Mənim üçün çox xoş oldu. Təxminən 3 ay bu komandanın düşərgəsində oldum. Orada özümü xeyli dost qazanmışdım. Həmin insanları yenidən gördüyüm üçün şad oldum.

- Ümumiyyətlə, “Xəzər Lənkəran”ın hazırkı durumunu necə qiymətləndirərdin?

- “Xəzər Lənkəran”da hər şeyin pis olduğunu deməzdim. Aydın məsələdir ki, heyətlə bağlı problemləri var. Amma gənclər etimadı doğruldurlar. Bu cür davam etsələr, qarşıdakı oyunlarda daha yaxşı nəticələr əldə edəcəklərini düşünürəm.

- “Xəzər Lənkəran”ın vəziyyəti düzəlsə, yenidən bu komandaya qayıtmağın mümkündür?

- Bu haqda düşünmürəm. Hazırda mən “Kəpəz”in futbolçusuyam və məni bu komandanın uğurları maraqlandırır. Amma gələcəklə bağlı indidən qəti söz demək də çətindir. Rəhbərlik mənim xidmətimdə maraqlı olsa, danışıqlar apara bilərik.

- “Kəpəz”in cari mövsümdəki məqsədi nədir?

- Biz hər oyunda uğur qazanmaq istəyirik. Hazırdı ardıcıl qələbələr qazanırıq ki, bu da çox müsbət haldır. Çalışacağıq qarşıdakı turlarda da uğurlu çıxış etməklə yüksək yerlər uğrunda mübarizəmizi davam etdirək.

- Qarşıdan “Zirə” ilə oyun gəlir. Hansı ki, “Kəpəz” ilk dövrədə bu komandayla görüşdə qələbəni son anda əldən vermişdi...

- Çox çətin oyun olacaq. “Zirə” yüksək yerlər uğrunda əsas rəqiblərimizdən biridir. Bu matçı bizim üçün 6 xallıq oyun kimi qiymətləndirmək mümkündür. Əlimizdən gələni edəcəyik ki, “Zirə” ilə oyunda da qələbə eriyamızı davam etdirək.