Zets: “Bu görüşdə qələbə qazanmalıyıq”

Bu həftə Topaz Premyer Liqasında IX turun oyunlarına yekun vurulacaq. I dövrənin son turunda “Qəbələ” çempionatın debütantı “Zirə” ilə qarşılaşacaq. Futbolxeber.az-ın məlumatına görə, “Qırmızı-qaralar”ın bosniya və herseqovinalı hücumçusu Ermin Zets oyun ilə bağlı fikirlərini gabalafc.az saytına açıqlayıb: “Çətin və maraqlı oyun olacaq. Çünki “Zirə” debütant olmasına baxmayaraq, cari mövsümdə yaxşı oyun nümayiş etdirir. Düşünürəm ki, futbolçuların ustalıq səviyyəsinə görə rəqibdən üstünük. Həm də dövrənin son qarşılaşmasını öz meydanımızda keçirəcəyik. Bu görüşdə qələbə qazanmalıyıq. Çünki azarkeşlərimiz önündə 3 xal əldə etməliyik. Bizim üçün bu xallar vacib olduğundan qalib gəlməliyik. Bunun üçün bacarığımızı ortaya qoyacağıq. Qalib gəlmək üçün öz oyunumuzu nümayiş etdirməliyik”.

Zets UEFA Avropa Liqasının qrup mərhələsinin iki gün əvvəl keçirilən “Borussiya” (Dortmund, Almaniya) ilə oyununu da (1:3) xatırlayıb: “Görüşün əvvəlində qol vurmaq üçün 2-3 çox yaxşı imkanımız oldu. Adətən belə imkanları qaçıran komanda sonda uduzur. Bizim oyunda da belə oldu. Əminliklə deyə bilərəm ki, ən yaxşı oyunlarımızdan birini keçirdik”.