Mikayıl Nərimanoğlu: “Kəpəz”də baş məşqçinin işinə heç kim qarışmır”

“Gəncə şəhər icra hakimiyyətinin başçısı Elmar Vəliyev "Kəpəz"in baş məşqçisi Şahin Diniyevlə görüşdü. Elmar Vəliyev komandanı “Xəzər Lənkəran” üzərində qələbə münasibəti ilə təbrik etdi və təkliflərini söylədi”. Futbolxeber.az saytına açıqlamasında bu sözləri “Kəpəz”in Müşahidə Şurasının üzvü Mikayıl Nərimanoğlu deyib.

M.Nərimanoğlu qeyd edib ki, “Kəpəz”də baş məşqçinin işinə rəsmi şəxslərdən heç kim qarışmır: “Icra başçısı komandanın hər oyununu stadiondan izləyir. “Kəpəz”ə dəstək olur. Amma komandada baş məşqçinin işinə heç kim qarışmır. Nə icra başçısı, nə də Müşahidə Şurasının sədri”.

Nərimanoğlu Premyer Liqanın IX turunda “Xəzər Lənkəran” üzərində 1:0 hesabı ilə qalib gəldikləri görüş haqda da fikirlərini açıqlayıb: “Birinci hissədə komanda yaxşı oynadı. “Kəpəz” rəqibdən üstün idi. Lakin fasilədən sonra komanda bir qədər sakit oynadı”.

“Ardıcıl qələbələrdən sonra “Kəpəz”in avrokuboklara iddia etdiyini söyləmək olarmı” sualını isə Mikayıl Nərimanoğlu belə cavablandırıb: “Gəlin tələsməyək. Bəli, komanda mövsümə istədiyi kimi start verməsə də, son turlar uğurlu çıxış edir. Komandada inkişaf var. Lakin indidən avrokuboklar haqda danışmaq çox tez olar”.