Şahdağ”ın baş məşqçisi istefa verdi

Futbol üzrə Azərbaycan I divizionunda mübarizə aparan Qusarın “Şahdağ” futbol klubunun baş məşqçisi Telman Cavadov istefa verib. Futbolxeber.az-ın məlumatına görə, istefaya komandanın I divizionunda, eləcə də Azərbaycan Kuboku yarışlarında uğursuz çıxışı səbəb olub.

“Şahdağ” kubok uğrunda mübarizəni doğma meydanda “Şəmkir” kollektivinə 1-3 hesabı ilə uduzduqdan sonra 1/16 final mərhələsində dayandırıb. Azərbaycan I divizionunda isə beş oyundan sonra cəmi bir xal toplayan klub sonuncu pillələrdə qərarlaşıb.

Klubun mətbuat xidmətinin rəhbəri Rüstəm Əzimov AZƏRTAC-a bildirib ki, yeni baş məşqçisinin adı bu gün keçirilən iclasdan sonra məlum olacaq.

“Şahdağ” futbol klubunun baş məşqçisi postundan istefa verən Telman Cavadov bundan sonra komandanın aşağı yaş qruplarını çalışdıracaq.