UEFA-nın müraciəti “Qəbələ” və “Qarabağ”a sərf etmir: “Biz biletləri 1 avrodan da ucuz satırıq"

Hazırda miqrantlarla bağlı ciddi problem yaşayan Avropa bu çətinliyin aradan qalxmasında UEFA-nın yardımına ümid edir. Futbolxeber.az-ın məlumatına görə, qitə futbol qurumu da öz növbəsində cari mövsüm avrokuboklarda iştirak edən komandalara yardımla bağlı müraciət edib. Belə ki, UEFA avrokubok iştirakçılarından ev oyunlarında satdıqları hər biletdən 1 avronu miqrantanlara yardım etməyi tövsiyə görüb.

Avropa futbol qurumunun bu müraciəti isə klublar tərəfindən heç də birmənalı qarşılanmayıb. Artıq Avroliqanın qrup mərhələsində “Qəbələ”nin rəqibi olan “Krasnodar”ın maliyyə direktoru Aram Fundukyan bu məsələ etirazını bildirib: “Əziz UEFA. Biz qaçqınlara məmuniyyətlə yardım etmək istərdik. Amma biletləri 50 rubla satırıq. Bu isə heç 1 avro etmir. Belə çıxır ki, öz cibimizdən əlavə pul verməliyik?”

Məsələ ilə bağlı “Qəbələ” rəsmilərinin də mövqeyini öyrəndik. Klubun marketinq üzrə meneceri Səməd Nəsibov bununla bağlı klubda hələlik müzakirə aparmadıqlarını bildirdi.

Aydın məsələdir ki, UEFA-nın bu müraciəti Azərbaycan klublarına da sərf etməyəcək. Çünki Avroliqada mübarizə aparan təmsilçilərimizin ev oyunları üçün satışa çıxarılan biletlərin əksər hissəsi 1 manata satılır ki, bu da heç 1 avro etmir.