“Bundan sonra “Xəzər Lənkəran”la oyunu düşünəcəyik”

“Əsas məqsədimiz qalib gəlmək idi. Xal itkisi bizi sonuncu pillələrə yuvarlandıracaqdı”. Futbolxeber.az-ın məlumatına görə, bu sözləri “Neftçi”nin baş məşqçisi Samir Əliyev “Rəvan”ı 3:1 hesabı ilə məğlub etdikləri oyundan sonra deyib.

Əliyev artıq növbəti turda qarşılaşacaqları “Xəzər Lənkəran”la oyunu düşündüklərini bildirib: “Qarşıda “Xəzər Lənkəran” və “Qarabağ”la oyunlarımız var. Uğursuz nəticənin fonunda gərginlik ola bilərdi. İlk hissədə qol vurmaq məqsədimizə çatdıq. Aylton qırmızı vərəqə aldıqdan sonra “Rəvan” ikinci hissədə bizə problem yaratdı. Emin Quliyevə uğurlar arzu edirəm. Düşünürəm ki, “Rəvan” çox komandanın başını ağrıdacaq. Bundan sonra “Xəzər Lənkəran”la oyunu düşünəcəyik. Həmin oyun derbidir, amma bizim üçün komandanın fərqi yoxdur. “Xəzər Lənkəran”ın gənc oyunçuları da yaxşı təsir bağışlayır”.

“Neftçi”nin çalışdırıcısı Vüqar Nadirovun mümkün keçidinə də toxunub: “Vüqar Nadirovun “Neftçi”yə keçmək ehtimalına gəlincə. Həmin futbolçu gündəmimizdə deyil. Onun cinahında çox futbolçumuz var. İstəyirik ki, həmin oyunçuları azərbaycan futboluna qazandıraq”.