“Panatinaikos”un baş məşqçisi: “Sabahkı oyunda qələbəyə ümid edirəm”

Sabah Avroliqanın pley-off mərhələsinin ilk görüşü çərçivəsində “Qəbələ” ilə qarşılaşacaq Yunanıstan təmsilçisinin baş məşqçisi hazırda matçın keçiriləcəyi “Bakcell Arena”da oyunöncəsi mətbuat konfransı keçirir. 

 Anastasiu heyət baxımından problem yaşamadıqlarını bildirib: “Heyət baxımından çətinliyimiz yoxdur. Komanda meydanda gücünü göstərməyə hazırdı”

“Panatinaikos”un çalışdırıcısı sabah yalnız qələbə haqda düşündüyünü bildirib: “Bizim qarşıda 2 vacib oyunumuz var. Həm sabahkı, həm də bazar ertəsi keçirəcəyimiz görüşdə uğur qazanmalıyıq. Sabahkı matçda yalnız qələbəyə ümid edirəm”.

“Panatinaikos”un baş məşqçisi ilk oyunu səfərdə keçirmələrini üstünlük hesab etmir: “Ilk oyunumuzu səfərdə keçirəcəyik. Amma bunun “Panatinaikos”, yoxsa “Qəbələ” üçün üstünlük olduğunu yalnız sabahkı görüşdən sonra söyləmək olar. “Qəbələ” haqda daha əvvəl məlumatımız az idi. Lakin sonradan komandanın Avroliqada keçirdiyi oyunları, eləcə də çempionatda “Qarabağ” və AZAL-la matçlarını izlədik”.