Abdulaye: “Üçüncü yer də pis nəticə deyil"

“İnter”in müdafiəçisi Bryus Abdulaye başa çatmış mövsümlə bağlı fikirlərini klubun rəsmi saytı ilə bölüşüb. Futbolxeber.az-ın məlumatına görə, Abdulaye "İnter"in göstəricisini qənaətbəxş nəticə kimi qiymətləndirib: "Mövsüm çox ağır alındı. Müəyyən zaman ərzində turnir cədvəlində liderlik etdik, lakin fevralda komanda bu liderliyini itirdi. Təəssüf ki, turnir cədvəlində birinci yer uğrunda əsas rəqiblərimizlə qış fasiləsindən sonra keçirdiyimiz oyunlarda lazım olan nəticəni əldə edə bilmədik. Bizim yaxşı futbolçularımız var, komandamıza yaxşı məşqçi rəhbərlik edir, lakin buna baxmayaraq, bizi çempionluqdan məhrum edən səhvlərə yol verdik. “İlk altılıq”da “Qarabağ” və “Neftçi” komandalarına qarşı səfər oyunlarında rəqibə heç nədə uduzmadıq, lakin bir səhv hər şeyin üstündən xətt çəkdi. Futbol belədir. Bizə buraxılan səhvlərdən nəticə çıxarmaq və həmin səhvləri növbəti mövsümdə təkrarlamamaq qalır. Amma üçüncü yer də pis nəticə deyil. Bizi qarşıda Avropa Liqasının oyunları gözləyir və komanda bu turnirdə gücünü göstərməlidir”.