“Kəpəz” AZAL-ı da məğlub etdi

İyul ayının 7-də “Kəpəz” təlim-məşq toplanışı çərçivəsində ikinci yoxlama oyununu keçirib. Futbolxeber.az-a klubun mətbuat xidmətindən verilən məlumata görə, komanda “Dalğa Arena”da AZAL-la qarşılaşıb. Görüşə erkən qollarla başlayan “sarı-göylər” 10-cu və 14-cü dəqiqələrdə rəqibi oyuna meydanın mərkəzindən başlamağa məcbur edib. Əvvəlcə gənc futbolçu Tural Rzayev dəqiq zərbə ilə hesabı açıb. Bir qədər sonra Şəhriyar Rəhimov topu “təyyarəçilər”in qapısına göndərməklə hesabı artırıb.

İkinci hissədə AZAL buraxılan qollardan yalnız birinin əvəzini çıxıb. 11 metrlik cərimə zərbəsindən Tagim Novruzov fərqlənib - 2:1.

Xatırladaq ki, bu “Kəpəz”in Bakı toplanışında ikinci qələbəsi olub. “Kəpəz” ilk yoxlama oyununda “Sumqayıt”ı 1:0 hesabı ilə məğlub etmişdi.