Statistikanın diqtəsiylə...YAZI

Azərbaycan klublarının avrokuboklarda 2015/16 mövsümündə startı qələbəsiz oldu. Paytaxt təmsilçiləri “İnter”lə “Neftçi” Avropa Liqasına heç-heçəylə başladıqları halda, “Qəbələ” minimal fərqlə uduzdu. İndi onları iyulun 9-da cavab matçları gözləyir. Təmsilçilərimizin nəticələri məndə tarixə səyahət etməyə maraq oyatdı. Maraqlıdır, 1994-cü ildən avrokuboklarda təmsil olunan Azərbaycanın klubları üçün ötən həftəki nəticələr nə dərəcədə düşərlidir?

1:1-ylə start uğursuz olsa da...

İlk öncə onu deyim ki, bu statistik araşdırmamda hesablarda meydan amilini əsas götürmüşəm. Məsələn, “İnter”in imza atdığı 1:1 hesabından hamısını yox, yalnız səfərdə olanları nəzərə almışam. Avrokuboklarda növbəti startımız bu komandayla oldusa, yazıma da onunla başlayıram. Məlum olduğu kimi, gümüş medalçı olan “bankirlər” Albaniyada yerli “Laçi”ylə 1:1 hesablı bərabərliyə qaldı. İndiyədək 3 dəfə belə nəticə qeydə olunub. 2006-cı ildə UEFA kubokunda “Qarabağ” Moldovadan “Zimbru”yla matçdan bu hesabla qayıtdı və evdə “Şəfa” stadionunda da 1:1 etdi. Nəticədə qalibi müəyyənləşdirmək üçün 30 dəqiqəlik əlavə vaxt təyin olundu. Onda qələbə topunu vuran Kişinyov klubu 2:1 hesabı ilə qalib gəldi və mərhələ keçdi.

Bundan 2 il sonra “Neftçi” İntertoto kubokunda Belçikadan “Jerminal”la oyundan 1:1 hesabı ilə qayıtdı. Tofiq Bəhramov adına Respublika stadionundakı cavab matçında 1:0 hesabı ilə qələbə qazanan “ağ-qaralar” növbəti mərhələyə yüksəldi. 2011-ci ildə “Qarabağ” Avropa Liqasında Farer adalarının “Streymur” klubu ilə səfərdə keçirilən ilk oyunda 1:1 hesablı heç-heçəyə imza atdı. Mərkəzi arenamızda baş tutan cavab matçında qolsuz bərabərlik Ağdam təmsilçisini cütün qalibi etdi. 2013-cü ildə isə digər “cırtdan ölkə”də - Maltada 1:1 hesablı heç-heçəmiz oldu. Bu, Avropa Liqasında ilk oyunda həmin nəticəyə imza atan “Xəzər Lənkəran” idi. Lənkərandakı təkrar oyunda 1:0 hesabı ilə qalib gələn cənublular mərhələ adladı.

“İnter” üçün sonluq belədir ki, ilk oyunda səfərdə 1:1 edən 4 Azərbaycan klubundan 3-ü sonda sevinən tərəf olub. Yəni 1:2-ylə start uğursuz olsa da, sonda yaxşı nəticələr verib.

Azərbaycana tarix yazdıran 1:2

Premyer Liqamızın ardıcıl 2-ci mövsüm bürünc mükafatçısı olan “Qəbələ” Tifllsdə “Dinamo”ya 1:2 hesabı ilə yenildi. Maraqlıdır ki, Azərbaycan klubları ilk dəfə Çempionlar Liqasında (ÇL) mərhələni məhz hesabla keçib. Bu, 2000-ci ildə “Şəmkir”lə olub. Onda Latviyada “Skonto”ya 1:2 hesabı ilə uduzan şəmkirlilər evdə bu hesabla qalib gəldi. Respublika stadionundakı oyunun əlavə vaxtında daha 2 qol vuran “Şəmkir” 4:1 hesablı qələbə ilə tarixi nəticəyə imza atdı.

Digər maralqı odur ki, həmin vaxtlar “Şəmkir”in qızıl medllar uğrunda əsas rəqibi olan “Neftçi” də ÇL-də ilk dəfə mərhələni 1:2-yla keçib. Bosniya və Herseqovinanın “Şiroki Briyeq” klubuna bu hesabla uduzan “ağ-qaralar” mərkəzi arenamızda qazandıqları 1:0 hesablı qələbə, səfər qolu ilə mərhələ keçiblər.

Yalnız 2009-cu ildə Avropa Liqasında səfərdəki ilk oyunda 1:2 hesablı məğlubiyyət Azərbaycan təmsilçisinə düşərli olmayıb. Bu, “İnter”in Slovakiyanın “Spartak” klubu ilə sınağı idi. Trnava təmsilçisi cavab matçında da üstün tərəf idi - 3:1. Yeri gəlmişkən, həmin oyun hazırkı təmsilçilərimizin cavab matçlarını keçirəcəyi iyulun 9-da olub və bu tarix avrokuboklarda yalnız həmin vaxta təsadüf edib. “Qəbələ”ni uduzduğu 1:2 hesabı isə 3 dəfədən 2-də Azərbaycana düşərli olub.

“Xəzər Lənkəran”a mərhələ adladan 2:2

Nəhayət, ölkə kubokunun son finalçısı “Neftçi” ilk oyunda Çernoqoriyanın “Mladost” klubu ilə 2:2 hesablı heç-heçə etdi. Bu hesab avrokuboklarda ilk oyunlarımızda yalnız 2 dəfə qeydə alınıb. Onlardan evdə olanı isə "Neftçi"nin prinsipial rəqibi “Xəzər Lənkəran”a aiddir. 2012-ci ildə Lənkəranda keçirilən matçda rəqib Estoniyanın “Nomme Kalyu” klubu idi. Tallində keçirilən cavab oyununda 2:0 hesabı ilə qalib gələn “Xəzər Lənkəran” həm tarixində avrokuboklarda ilk qələbəsini qazandı, həm də ilk dəfə mərhələ adladı. Bu, hələ ki yeganədir.

Bir maraqlı fakt da odur ki, “Neftçi” 2012-ci ildən bu yana avrokuboklarda evdə ilk oyunlarında qələbə qazana bilməsə də, əksər vaxt mərhələ keçmək vəzifəsini səfərdəki cavab matçında yerinə yetirib. Evdə ilk görüşdə sonuncu qələbə isə 2012-ci ilin iyulun 17-də Çempionlar Liqasında Mərdəkanda “Dalğa Arena”da Gürcüstanın “Zestafoni” klubu üzərində böyük hesabla olub - 3:0.

Göründüyü kimi, “İnter”ə düşərli olmayan 9 iyul tarixini nəzərə almasaq, ilk oyundakı nəticələr gələcəyə nikbin baxmağa əsas verir. Statistika bizim xeyrimizdədir, bəs cavab matçları nəyi vəd edir? Bunun üçün bir qədər də gözləməliyik...

Mehman SÜLEYMANOV