“Xəzər Lənkəran”ın yeni baş məşqçisinin adı məlum oldu

Növbəti mövsümdə iddialı olmağı hədəfləyən “Xəzər Lənkəran” baş məşqçi postunda dəyişiklik edib. Futbolxeber.az-ın məlumatına görə, cənub təmsilçisinin rəhbərliyi komandanın “sükanı arxası”na klubun idman direktoru Yunis Hüseynovu gətirib. Bu haqda apasport.az saytı xəbər yayıb. Qeyd olunur ki, baş məşqçi postunu tərk edən Elbrus Məmmədov isə əvvəlki işinə qaytarılıb. O, vaxtilə çalışdığı kimi, yenə “Xəzər Lənkəran”ın əvəzedici komandasına rəhbərlik edəcək.

“Xəzər Lənkəran”ın mətbuat xidmətinin rəhbəri Hüseyn Cəbrayıloğlu Futbolxeber.az saytına açıqlamasında qeyd edib ki, klub rəhbərliyi tərəfindən hələlik bu xəbərlə bağlı mətbuat departamentinə heç bir məlumat verilməyib.