“Qəbələ” “İnter”lə matçın hazırlıqlarına start verdi

Azərbaycan Premyer Liqasının XXXIV turu çərçivəsində mayın 16-da “İnter”lə qarşılaşacaq “Qəbələ” matçın hazırlıqlarına start verib. Futbolxeber.az-ın məlumatına görə, “Sumqayıt”la mayın 8-də səfərdə keçirilən XXXIII turun oyununun (2:0) ertəsi gün Bakıda məşq keçib, bir gün istirahətə buraxılan “qırmızı-qaralar” çalışmalarını bərpa edib.

Qəbələ şəhər stadionunda bir araya gələn komanda əvvəl fiziki hazırlıq keçib, ardınca toplu çalışmalara üstünlük verib. Bir müddət komanda ilə məşq keçməyib, “Sumqayıt”la oyunu buraxan Cavid Hüseynov da məşqə qatılıb. Hazırlıqlarda fizioterapiya kursu keçən Dodo və zədə səbəbindən müalicə olunan Ruslan Əmircanov iştirak etməyib. Roman Qriqorçukun yetirmələri oyuna qədər hazırlıqlarını Qəbələdə davam etdirəcək.

Qeyd edək ki, “İnter”lə Qəbələ şəhər stadionunda baş tutacaq oyun mayın 16-da keçiriləcək.