Yaşar Seyidov: “Bunu bacarsaq, “Bakı” Premyer Liqada qalacaq”

“AFFA gələn mövsüm Premyer Liqamızda iştirak etmək hüququ qazanan klubların adını açıqladı. “Bakı” klubu bu siyahıda yoxdur. Səbəb isə odur ki, biz müvafiq sənədləri Lisenziyalaşdırma Komitəsinə təqdim etməmişik”. Futbolxeber.az-ın məlumatına görə, bu sözləri Qol.Az-a açıqlamasında “Bakı” klbunun icraçı direktoru Yaşar Seyidov deyib.

Klub rəsmisi qeyd edib ki, mövcud duruma baxmayaraq “Bakı”nın yeni mövsümdən Premyer Liqada iştirakı mümkündür: “AFFA-nın qərarından sonra 10 gün müddətində Apelyasiya Komitəsinə şikayət edə bilərik. Lisenziya üçün tələb olunana sənədlərin bir çoxunu təqdim etmişik. Yalnız bəzi sənədlərdə çatışmazlıq var. Maliyyə ilə bağlı da çətinliyimiz var. Klub prezidenti Hafiz Məmmədova bu haqda məlumat vermişik. Çalışacağıq ki, 10 gün ərzində tələb olunan sənədləri təqdim edək. Bunu bacarsaq, Lisenziyalaşdırma Komitəsi yenidən “Bakı”nın məsələsinə baxacaq. Həyatda reallaşmayan məsələ yoxdur. Hər şey maliyyə ilə bağlıdır. Müəyyən problemlər var ki, onları həll etsək, lisenziya ala biləcəyik. Bunun üçün əməli işə keçməliyik”.

Y.Seyidov lisenziya ilə bağlı sənədləri qaydasında olan birinci divizion təmsilçisi  “Kəpəz” və “Zirə”nin artıq Premyer Liqaya hazırlaşamasına da münasibət bildirib: “Sözsüz ki, biz lazım olan sənədləri təqdim edə bilsək, onda həmin komandalardan birinin əvəzinə “Bakı” Premyer Liqada iştirak etmək hüququ qazanacaq. İdman prinsiplərinə əsasən daha yüksəkdə duran komanda Premyer Liqada çıxış edir”.