Nfor: “Unutmayaq ki, “Qarabağ”a qarşı oynayırdıq”

“Çətin qarşılaşma alındı. “Qarabağ”a qarşı ən yaxşı oyunlarımızdan birini nümayiş etdirdik. Ümumiyyətlə, meydanda çox maraqlı mübarizə getdi”. Futbolxeber.az saytına müsahibəsində bu səzləri “Neftçi”nin hücumçusu Ernest Nfor deyib.

Nfor məğlubiyyətin səbəbini belə izah edib: “Kiçik, fərdi səhvlərə yol verdik. Amma unutmayaq ki, “Qarabağ”a qarşı oynayırdıq. Rəqib əksər hallarda bizi əks-hücumlarda yaxalayırdı. Bu, onlarda çox gözəl alınırdı”.

“Neftçi”nin hücumçusu meydanda aqressiv davranışının səbəbini açıqlayıb: “Son 2 il yarım oyun praktikasından əziyyət çəkirəm. Adımı, nüfuzumu ortaya qoymalıyam. Bu zəifliyin göstəricisi deyil. Üstəlik, nəzərə alın ki, meydanda azlıqda qalmışdıq. 10 nəfərlə 11 nəfərə qarşı oynadıq”.

Nfor “Neftçi”də qalıb-qalmayacağı ilə bağlı sualı belə cavablandırıb: “Gələcəyim mənim xidmətimdə maraqlı olan insanlardan asılıdır. Rəhbərlik komandada qalmağımı istəsə, qalacağam. İstəməsələr, o zaman başqa kluba gedəcəyəmm. Hələ ki, qalmağımla bağlı hansısa təklif almamışam. Mövsümün sonunu gözləyək”.