Baçana Sxadadze: “Şans həmişə var”

“İnter”in hücumçusu Baçana Sxadadze “Neftçi” ilə oyundan sonra Futbolxeber.az saytına müsahibə verib.

- 0:2 hesablı məğlubiyyəti necə şərh edə bilərsən?

- Çətin oyun alındı. Biz şanslarımızı dəyərləndirə bilmədik. Bunun səbəblərini bilmirəm. İstədiyimiz kimi çıxış etmədik və yekunda da uduzduq. Rəqib isə şanslarını dəyərləndirdi.

- Məğlubiyyətdən sonra “İnter”in finala yüksəlmək şansını necə dəyərləndirirsən?

- Şans həmişə var. Ümid edirəm ki, evdə daha yaxşı oynayacağıq. Həmçinin rəqibin səhvlərindən yararlanmalıyıq. Qarşıda hələ 90 dəqiqəmiz var. Cütün taleyini xeyrimizə həll edə bilərik.

- Sanki “Neftçi” ilə oyuna “İnter” motivasiyasız çıxmışdı...

- Belə deməzdim. Müəyyən problemlər var idi. İkinci qolu heç nədən buraxdıq. Nə baş verdiyini anlaya bilmədim. Amma ruhdan düşmək olmaz. Başımızı yuxarı qaldırıb, öz oyunumuzu göstərməliyik.

- Yenilgiyə görə müdafiəçiləri günahlandırmaq olar?

- Tək müdafiə xəttini günahlandırmaq olmaz. Məğlubiyyətdə hamının payı var. Biz də hücumda yaxşı oynaya, qol vura bilmədik. Meydana 11 nəfər çıxırıq və nəticədə hamının günahı da olur, uğuru da.

- Cahangir Hacıyevin Beynəlxalq Bankdan ayrılmasından sonra “İnter”in gələcək taleyi qeyri-müəyyəndir. Bu məqam komandanın çıxışına təsir göstərir?

- Hazırda suallar çoxdu. Amma biz futbolçuyuq. Klubla müqaviləmiz, üzərimizə düşən öhdəliklərimiz var. İstənilən halda onları yerinə yetirməliyik. Mən ümid edirəm ki, “İnter” üçün hər şey yaxşı olacaq. Mənim komandadan gedib-getməməyindən asılı olmayaraq.

- “İnter” çempion ola bilməsə və kuboka həsrət qalsa, mövsümü komanda üçün uğursuz hesab etmək mümkündür?

- Yox, nəyə görə ki? Pozitiv məqamlar çoxdu. Həm də indidən yekun nəticə haqda danışmaq tezdi. Finala çıxmasaq belə, “İnter”in minimum vəzifəsi daim avrokuboklarda oynamaqdı. Bu dəfə də həmin tapşırığın öhdəsindən gəlməliyik.