“Xəzər Lənkəran”ın tərcüməçisi “Neftçi”nin futbolçusu ilə aralarındakı mübahisədən danışdı

Dünən keçirilən “Xəzər Lənkəran” - “Neftçi” (2:2) oyunundan sonra meydan sahiblərinin tərcüməçisi Elvar Quliyevlə qonaqların futbolçusu Erik Ramos arasında kiçik mübahisə yaşanıb. Qarşılaşmadan sonra Elvar Quliyev Futbolxeber.az saytına verdiyi açıqlamada insidentə belə aydınlıq gətirib: “İkinci dövrədə “Dalğa Arena”da baş tutan “Xəzər Lənkəran” - “Neftçi” oyunu 2:2 hesabı ilə tamamlanmışdı. Həmin vaxt “Neftçi” son dəqiqədə vurduğu qolla məğlubiyyətdən qaçmışdı. Cavab qolundan sonra rəqib futbolçu Erik Ramos üzünü bizim azarkeşlərə tutaraq tərbiyəsiz hərəkət etmişdi. Mən Ramosa yaxınlaşaraq, bu dəfə “Xəzər Lənkəran”ın yenilgidən qaçdığını və onun həmin vaxt etdiyi hərəkətin düzgün olmadığını bildirdim. O isə yenə “ənənə”sinə sadiq qalaraq, bu dəfə də tərbiyəsizlik etdi. Amma söhbəti uzatdım. Ona görə də sözümü deyib, onun yanından uzaqlaşdım”.