Xorvat məşqçi: “Azərbaycanın qrupdan çıxmaq üçün böyük şansı var”

Xorvatiyanın 17 yaşadək futbolçulardan ibarət milli komandasının baş məşqçisi Dario Başiç Futbolxeber.az saytına müsahibə verib.

- Elit-raundun ilk turunda komandanız Azərbaycan millisi üzərində böyükhesablı (4:0) qələbə qazandı. Qarşılaşma barədə nə deyə bilərsiz?

- İlk oyunlar həmişə çətin keçir. Oyunçularımın üzərində təzyiq var idi. Çalıdıq bunu aradan qaldıraq. İstəyimizə çatdıq və yaxşı nəticəyə nail olduq.

- Azərbaycan millisi bu gün sizi təəccübləndirə bildi?

- Azərbaycanın əvvəlki oyunlarına baxıb, rəqibi analiz etmişdik. Məşqlərimizi də buna uyğun qurmuşduq. Oyunçularımı təbrik edirəm. Onlar tapşırıqlarımı tam yerinə yetirdilər.

- Komandanız ikinci hissədəki qolları başla vurdu. Bu, təsadüf idi, yoxsa xüsusi hazırlıq?

- Azərbaycanın İsveçrə ilə oyununa baxmışdıq. Bilirdik ki, cinahdan ötürülən toplarda çətinlik çəkirlər. Bunu analiz etmişdik. Ona görə də bu gün məhz cinah ötürmələrinə üstünlük verirdik.

- Bu gün Xorvatiya millisi Azərbaycanı istəkdə üstələdi, yoxsa ustalıqda?

- Komandamda bir neçə zədəli oyunçu var idi. Onlar bu gün meydanda yox idilər. Odur ki, görüşə komanda şəklində hazırlaşdıq, komanda ruhu nümayiş etdirdik. İtkilərimiz olsa da, onları ötr-basdır etmək üçün əlimizdən gələni etdik.  

- Xorvatiya yığmasının baş məşqçi kimi bu qrupda əsas rəqib qismində hansı komandanı görürsüz?

- Biz bütün rəqiblərə hörmətlə yanaşırıq. Hər oyuna ciddi hazrlaşırıq. Deyə bilmərəm ki, hansı komandaya qarşı oynamaq çətindi. 2 gün sonra Serbiya ilə görüşəcəyik. Qonşularımızla üz-üzə gələcəyik. Yəqin ki, bu baxımdan onlarla oynamaq bir qədər çətin olar.

- Azərbaycan yığmasının qrupda heç olmasa ikinci yeri tutmaq şansını necə dəyərləndirirsiz?

- Azərbaycan güclü rəqibdi. Serbiya və Portuqaliya üçün çətin olacaq. Komandanız bu gün ilk hissədəki oyununu göstərsə, qrupdan çıxmaq üçün böyük şansı var.

- Növbəti turda Serbiya ilə qarşılaşacaqsınız. Siyasi məsələləri nəzərə alsaq, bu oyunu Xorvatiya üçün daha vacib hesab etmək olar?

- Yox. Oyunçularım tərəfdən deyə bilərəm ki, heç bir problem yaşamayacağıq. Həm də 2 həftə əvvəl Serbiyanın U-16 komandası ilə yoxlama görüşündə qarşılaşmışdıq. Oyunumuzu siyasi məsələlərlə bağlamaq istəməzdim.