“Simurq” oyunöncəsi məşqə çıxdı, futbolçuların danışmasına icazə verilmədi

Sabah Azərbaycan Premyer Liqasının 24-cü turu çərçivəsində “İnter”in qonağı olacaq “Simurq” bu gün Bakıda oyunöncəsi son məşqə çıxıb. Futbolxeber.az-ın məlumatına görə, Zaqatala klubunun məşqi matçın keçiriləcəyi “İnter Arena”da baş tutub. Hazırlıq prosesi təxminən 1 saat davam edib. Məşqi izləyənlər arasında mətbuat nümayəndələri olsa da, hazırlıq prosesindən sonra onların futbolçularla danışmalarına icazə verilməyib. “Simurq”un mətbuat xidmətinin rəhbəri Rüstəm Allahverdiyev bildirib ki, oyundan öncəki gün futbolçuların mətbuatla ünsiyyətinə daim qadağa qoyulur.