Filipe Kandidodan qələbə şərhi

"Sumqayıt" Azərbaycan Premyer Liqasının VII turu çərçivəsində "SOCAR Polymer Arena"da "Qəbələ"ni 4:1 hesabı ilə məğlub edib.

Futbolxeber.az saytının məlumatına görə, "Sumqayıt"ın baş məşqçisi Filipe Kandido oyundan sonra keçirilən mətbuat konfransında jurnalistlərin suallarını cavablandırıb:

"Hesab bu gün qələbəyə tam layiq olduğumuzu açıq şəkildə göstərir. Hücumda qol imkanları yaratdıq və erkən qollar vurduq. Hesabda 2:0 önə keçdikdən sonra rəqib fərqi azaltsa da, dərhal reaksiya verərək üçüncü qolu vurduq. İlk hissədə oyuna tam nəzarət etdik və fasiləyə 3:1 hesablı üstünlüklə yollandıq. Açığı, ikinci hissədəki oyunumuzdan tam razı deyiləm. Komanda uzun müddətdir qələbə qazana bilmirdi. Buna görə də futbolçular üstünlüyü qorumaq məqsədilə istər-istəməz müdafiəyə daha çox diqqət yetirməyə başladılar. Bu da oyun planımıza müəyyən qədər təsir etdi. Buna baxmayaraq, dördüncü qolu vurduq və matçı inamlı qələbə ilə başa vurduq".

- Portuqaliya millisinin ardıcıl dörd qələbə qazandığını nəzərə alsaq, vətəninizdə Kriştianu Ronaldo ətrafında gedən müzakirələr barədə nə düşünürsünüz? Həmçinin daha əvvəl əvəzedici heyətə göndərilən Nihad Əhmədzadənin bu gün meydana çıxmasının səbəbi nə idi?

- Ronaldo ilə bağlı vəziyyət hazırda Portuqaliya mətbuatında ən çox müzakirə olunan mövzudur. Lakin bu, mənə ünvanlanmalı sual deyil. Əsas odur ki, millimiz Ronaldosuz da dörd qələbə qazanıb. O, dünyanın ən yaxşı futbolçularından biridir, amma futbolda hər şey baş verə bilər. Nihad Əhmədzadəyə gəlincə, onun ikinci komandaya göndərilməsi klubun daxili intizam qərarı idi. Portuqaliyada bu, adi təcrübədir. Gənc futbolçular oyun praktikası qazanmaları və formalarını bərpa etmələri üçün ikinci komandaya göndərilirlər. Bu gün Nihad əsas heyətə qayıtdı və oynamaq şansı qazandı.