Denis Silva: “Qol epizodunda bəzi futbolçularımız geri qayıtmadı”

“Neftçi”nin müdafiəçisi Denis Silva “Qarabağ”la oyundan sonra Futbolxeber.az saytına müsahibə verib.

- “Neftçi” cari mövsümdə ikinci dəfə öz meydanında “Qarabağ”a uduzdu. Məğkubiyyətin səbəbini nədə görürsən?

- Qarşılaşma barədə fikir bildirmək bir qədər çətindi. Uduzmaq istəmirdik. Uğur qazanmaq üçün bütün gücümüzü meydanda qoyduq. Qalib gəlmək istəsək də, alınmadı.

- “Neftçi” vəziyyəti dəyişə biləcək?

- Vəziyyətimiz çətindir. Amma hər şey bizdən asılı deyil.

- Bir epizodda “Qarabağ”ın hücumçusu Reynaldonun zərbəsinin qarşısını aldıqdan sonra buna çılğın reaksiya verdiniz. Bunun xüsusi bir səbəbi var?

- Reynaldo güclü futbolçudu. Həmin anda komandamı xilas etdiyim üçün sevindim. Amma söhbət məndən getmir. Əsas olan komanda şəklində uğur qazanmaqdı.

- Son dəqiqədə gələn qol nəyin nəticəsidir?

- Həmin epizodda bəzi futbolçularımız geri qayıtmadı. Onları da başa düşmək olar, futbolçu da insandı, qaçır və yorulur. Meydanda belə halların olması normaldı. Sona yaxın diqqəti də əldən verdik.

- 90 dəqiqə ərzində “Qarabağ” “Neftçi”nin qapısı qarşısında xeyli sayda qol epizodu yaratdı. Müdafiədəki boşluqlar nədən irəli gəlirdi?

- Bunun dəqiq cavabını demək çətindi. Günahı kiminsə üstünə atmaq düzgün deyil.