“Arxayınlaşsaq, dərhal cəzalandırılacağıq”

“Hər iki komandanın ifasında maraqlı oyuna şahidlik etdik. Derbiyə layiq oyun oldu, hər iki tərəf fair-play qaydalarına riayət etdi. Oyun ərzində xırda toqquşma olsa da, futbolçular vaxtında sakitləşdilər”. Futbolxeber.az saytına verdiyi açıqlamada bu sözləri “Qarabağ”ın kapitanı Rəşad Sadıqov deyib.

“Neftçi” ilə oyun barədə danışan təcrübəli futbolçu, hakimlik məsələsi ətrafında ajiotaj yaradılmağın əleyhinə olduğunu vurğulayıb: “Heç vaxt hakimlik barədə danışmaq istəməmişik. Düzdür, “İnter”lə oyundan sonra hakim barədə çox söhbətlər oldu. Amma o hadisəni hər kəs müzakirə edirdi”.

“Qarabağ”ın rəqibi elə “Qarabağ”dı” fikri ilə razılaşmayan Sadıqov, indidən çempionluq barədə danışmağın erkən olduğunu söyləyib: “Rəqiblərimiz güclüdü, çempionatı isə çətin keçir. Arxayınlaşsaq, dərhal cəzalandırılacağıq. Rəqiblərimiz ardıcıl qələbə seriyası yaxalasa, çətin vəziyyətə düşə bilərik. Ötən mövsüm 13 xallıq fərq sonradan 6-ya endi. Üstəlik, sona 3 tur qalmış “İnter”lə də oyunumuz var idi. Onda çətin duruma düşmüdük. Halbuki hamı bizi çempion hesab edirdi”.