“Neftçi” rəsmisi: “Biz hakim təyin etmirik, dəyişdirmirik, sifariş vermirik”

“Qarabağ”ın “Əliyar Ağayevin istənilən hakimlə dəyişməsini təklif edirik” açıqlamasına “Neftçi”dən cavab gəlib. “Ağ-qaralar”ın mətbuat xidmətinin rəhbəri Gündüz Abbaszadə Futbolxeber.az saytına verdiyi açıqlamada bunları deyib: “Biz “Qarabağ”la oyunun Əliyar Ağayevə tapşırılmasına etiraz etmədik. Sadəcə olaraq, sözügedən hakimi obyektiv olmağa dəvət etdik. Bizim istəyimiz təmiz hakimlikdir. Kim güclüdürsə, qoy, o da qalib gəlsin. Lakin bəziləri sözümüzü başqa cür anlayıb. "Qarabağ”ın “Neftçi” və AFFA-ya müraciətinə cavab olaraq deyim ki, biz hakim təyin etmirik, dəyişdirmirik, sifariş vermirik. Bunu bacaranlar bilər və təklif edər. Düşünürük ki, hakimin dəyişdirilməsi ilə bağlı müraciət edib, şou yaratmağa ehtiyac yoxdu. "Qarabağ” bu qədər obyektivdirsə, qoy, Muarem Muaremin əvvəlki turda "Simurq”la oyundakı hərəkətinə hüquqi qiymət verilməsi ilə bağlı AFFA İntizam Komitəsinə müraciət etsin və futbolçu cəzasını alsın”.