Julius Vobay: “Çempionluq uğrunda sona kimi mübarizə aparacağıq”

“Neftçi”nin futbolçusu Julius Vobay Futbolxeber.az saytına müsahibə verib.

- “Neftçi” “Simurq”la oyunda qələbə qazana bilmədi. Xal itkisinin səbəbini nədə görürsən?

- Hesab edirəm ki, yaxşı oynadıq. Sadəcə, bəxtimiz gətirmədi. İmkanlarımız oldu, amma onlardan yararlana bilmədik. Artıq bu oyunu unudub, irəli baxmaq lazımdı.

- Artıq 2 oyundur ki, “Neftçi” qələbəyə həsrətdi. Bu, nədən irəli gəlir?

- Son iki oyunda qələbə qazana bilməməyimiz bəxtsizliklə bağlıdı. Əgər idman xoşbəxtliyi tərəfimizdə olsaydı, yaratdığımız epizodlardan bir neçəsini qola çevirə bilərdik. Son uğursuzluqlar da bəxtsizliklə əlaqədardı.

- Ardıcıl xal itkilərindən sonra “Neftçi”nin çempionluq şansının azaldığını söyləmək olar?

- Həqiqətən də itkiləri bizi zirvədən bir qədər də uzaqlaşdırır. Ancaq qarşıda uzun marafon var. Bu oyunlarda biz də itirdiklərimizi sığortalamağa çalışacağıq. Çempionluq uğrunda sona kimi mübarizə aparacağıq.

- Mirça Rednik mətbuata açıqlamasında səni “Petrolul”dan görmək istədiyini bildirib. Həqiqətən də Rumıniya klubundan təklif almışdın?

- Rednik “Petrolul”a dəvət etmişdi. Futbolçu üçün başqa klublardan təklif almaq normaldı. Harda oynayacağımla bağlı qərarı isə özüm verirəm.

- Deməli, “Neftçi”də qalacaqsan?

- Hazırda “Neftçi”dəyəm. Yayda da bu komandada qalmaq istəyirəm.