Millimizin hücumçusu: “Ruslar üzərində belə qələbə qazanacağımızı gözləmirdim”

“Yaxşı oyun sərgilədik. Uşaqlar əzmkarlıq nümayiş etdirdilər”. Futbolxeber.az-ın Sankt-Peterburqa ezam olunmuş əməkdaşına verdiyi açıqlamada bu sözləri U-19 millimizin hücumçusu İlkin Sadıqov deyib.

Rusiya-2 komandasına qarşı baş tutan oyunda dubl müəllifi olan məlumata görə, Sadıqov turnirdə mümkün olduğu qədər yaxşı nəticə qazanmağa çalışacaqlarını bildirib: “Bu gün gözəl oyunla qalib gəldik. Amma düzünü deyim ki, belə qələbə gözləmirdim. Qalib gələcəyimizə inanırdım, amma bu cür məhsuldarlıqla yox. Artıq ilk “altılıq”da qərarlaşacağımız dəqiqdir. Lakin bununla kifayətlənmək fikrində deyilik. Bacardıqca daha yaxşı nəticə qazanmağa çalışacağıq”.

Yaponiyaya qarşı baş tutan ilk oyunda meydana sonradan daxil olan, lakin ruslarla matçda start heyətində yer alan Sadıqov daim komandaya kömək etməyə hazır olduğunu vurğulayıb: “Kimin oynamasına baş məşqçi qərar verir. Mənim nəsə deməyim düzgün çıxmaz. Nə vaxt şans versələr, əlimdən gələni etməyə hazıram”.