İzmaylov Azərbaycandakı günlərini xatırladı: “Syominin inamı mənə kritik anda çox kömək oldu”

“Mən heç vaxt futbolçu kimi ölməmişdim. Sadəcə olaraq, həyatımda heç də asan olmayan dövr keçirdim. Bu isə istənilən insanın həyatında baş verə bilər. Belə çətin anlarda insan xarakter nümayiş etdirməlidir. Yekunda da mən qalib gəldim”. Futbolxeber.az-ın məlumatına görə, bu sözləri “Qəbələ”nin sabiq futbolçusu Marat İzmaylov deyib.

Hazırda “Krasnodar”ın şərəfini qoruyan təcrübəli futbolçu, “O Jogo”ya müsahibəsində ötən mövsümün ikinci yarısında Azərbaycanda çıxış etdiyi dövrü də xatırlayıb.

İzmaylov, “Siz “Qəbələ”yə keçərkən bəziləri deyirdi ki, futbolçu kimi tükənmisiz. Belə halda özünüzü necə hiss edirdiz” sualına cavab olaraq deyib: “Heç vaxt yenidən yüksək səviyyəyə qayıdacağıma şübhə etmirdim. “Qəbələ”yə keçidimin səbəbkarı Yuri Syomin idi. O mənim yaxşı dostumdur və bacarığıma bələddir. Biz “Lokomotiv”də uzun illər birgə çalışmışdıq. Beləcə, Azərbaycana yollandım. Syominin inamı mənə kritik anda çox kömək oldu. Onun dəstəyi çox vacib idi”.