“Simurq”un kapitanı çılğınlığının səbəbini açıqladı: “Ona görə “Qarabağ”a qarşı oynaya bilməyəcəyəm”

“Bura qələbə qazanmaq üçün gəlmişdik. Çox şadam ki, istəyimizə çatdıq”. Futbolxeber.az saytına verdiyi açıqlamada bu sözləri “Simurq”un kapitanı İlkin Qırtımov deyib.

“Qəbələ” ilə oyun haqda danışan Qırtımov, matçın gərgin alındığını vurğulayıb: “Çox maraqlı və gərgin oyun oldu. Erkən qol vursaq da, bundan sonra rəqib hesabı bərabərləşdirdi. Bundan sonra komandamız da “sına” da bilərdi. Amma sona yaxın toparlanıb, istəyimizə nail olduq”.

“Simurq”un kapitanı sarı vərəqə aldığı epizodda hakimə çılğıncasına etiraz etməsinin səbəbini də açıqlayıb: “Hakimə o cür etiraz etməyim səbəbsiz deyildi. Bu, mənim cari mövsümdə aldığım dördüncü sarı vərəqədir. Bundan sonra cəzalı duruma düşdüm. Halbuki növbəti turda “Qarabağ”a qarşı oynayırıq və həmin görüşdə meydanda olmağı çox istəyirdim. Bununla belə, inanıram ki komanda yoldaşlarım vacib oyunda yoxluğumu hiss etdirməyəcəklər”.