Şahin Diniyev: “Millinin baş məşqçi postuna yalnız əcnəbilərin namizəd olması düzgün deyil”

Futbol üzrə Azərbaycan millisinin sabiq çalışdırıcısı Şahin Diniyev millinin baş məşqçi postuna yalnız əcnəbilərin namizəd kimi müzakirə olunmasına münasibət bildirib. Futbolxeber.az-ın məlumatına görə, təcrübəli mütəxəssis sportpress.az-a açıqlamasında namizədlər arasında yerli məşqçilərin adının olmasının vacibliyini vurğulayıb: “İlk olaraq qeyd edim ki, namizədlər arasında yerli məşqçilərin adının olması vacibdir. Əks halda bu bizim məşqçilərə qarşı biganəlikdir. Çətin zamanlarda məşqçilərimiz futbolumuzda olub. İndiki dövrdə də onları unutmaq düzgün deyil. Mən özüm haqda danışmıram. Digər həmkarlarımı nəzərdə tuturam. Əcnəbi namizədlərlə yanaşı bizim məşqçilər də müzakirə obyekti olmalıdı. Azərbaycanda kifayət qədər savadlı məşqçilər var. Sadəcə onlara etibar etmək lazımdır”.

Diniyevin fikrincə, əgər yerli məşqçilərə şərait yaradılsa onlar əcnəbi həmkarlarından zəif olmadıqlarını sübut edə bilər: “Ad çəkmək düzgün olmazdı. Amma millidə işləməyə layiq azərbaycanlı məşqçilər var. Onlara inanmaq lazımdır. Bu gün namizədlər arasında yerli məşqçilərin olmaması biganə münasibətin əlamətidir. Yığmada işləməyə savadı çatan məşqçilərimiz var, onlara diqqət etmək gərəkdir. Şərait yaradılsa onlar heç kimdən zəif olmadığını göstərər”.