“Xəzər Lənkəran”: Tsxadadze mütləq cəzalanmalıdır!

"Xəzər Lənkəran” klubu “İnter”in baş məşqçisi Kaxaber Tsxadadzenin bu gün Premyer Liqanın 12-ci turu çərçivəsində baş tutan qarşılaşmadan sonra etdiyi qeyri-etik hərəkətdən narazıdır. Futbolxeber.az-ın məlumatına görə, Lənkəran klubunun mətbuat xidmətinin rəhbəri Hüseyn Cəbrayıloğlu insidentlə bağlı deyib: “Tsxadadze “Xəzər Lənkəran”a qarşı hörmətsizlik etdi. Onun rəqib komandanı, azarkeşləri təhqir etməyə haqqı yoxdur. Tsxadadze artıq ilk dəfə deyil ki, belə hərəkətə yol verir. AFFA bu haqda mütləq ölçü götürməlidir. Bu cür hadisələr 50, 100 dəfə təkrarlanıb. Ona görə də Tsxadadze mütləq cəzalanmalıdır”.

“Xəzər Lənkəran”ın baş məşqçisi Oğuz Çətin isə məsələyə belə münasibət bildirib: “Mən də Hüseyn bəyin dedikləri ilə razıyam. Qələbə qazanmaq olar. Amma rəqibi təhqir etmək olmaz. Tsxadadze bu gün 3 xal qazandı. Əvəzində çox şey itirdi”.