Arif Əsədov hakimi ələ saldı: “Az qalmışdı ki, özü də penalti vursun”

“Neftçi”nin baş məşqçisi Arif Əsədov Premyer Liqanın 12-ci turu çərçivəsində “Simurq”a 0:1 hesabı ilə uduzduqları oyunu şərh edib. Futbolxeber.az-ın məlumatına görə, Əsədov yenilgini tez bir zamanda unutmalı olduqlarını vurğulayıb: “Hiss olunur ki, fasilədən sonra komandada müəyyən problemlər var. Bu oyunu tez bir zamanda unudub növbəti görüşlərə hazırlaşmalıyıq. Bu oyuna qədər ilk pillədə idik. Bilirdik ki, “Simurq” bizə qarşı ikiqat güclə oynacaq. Bizim qapımıza ardıcıl oyunlarda penaltilər verilir. Bu gün iki penalti verildi. Az qalmışdı ki, hakim özü də penalti vursun. Əlavə edim ki, “Simurq”un qapanacağını bilirdik. Qol buraxdıqdan sonra futbolçularımda gərginlik yarandı. Bu da nəticəyə təsir etdi”.