Yaşar Seyidov: “Yəqin ki, Şəhriyarla Namiq “Bakı”ya qarşı səhv etdiklərini anlayıblar”

“Şəhriyar Əliyevlə Namiq Ələsgərovun bu gün “Bakı”ya qarşı oynamamalarının səbəbini bilmirəm. Klublar arasında hər hansı razılıqdan söhbət gedə bilməz”. Futbolxeber.az-ın Sportpress.az-a istinadən verdiyi məlumata görə, bu sözləri “Bakı”nın icraçı direktoru Yaşar Seyidov deyib.

Bu gün Azərbaycan Premyer Liqasının 12-ci turu çərçivəsində “Bakı” öz meydanında “Qarabağ”ı qəbul edəcək. Komandaların heyətləri açıqlanarkən bir maraqlı məqam diqqəti çəkir. Belə ki, bir müddət əvvəl “Bakı”nı “Qarabağ”a dəyişən Namiq Ələsgərov və Şəhriyar Əliyevin adı oyunun protokolunda yoxdur.

Yaşar Seyidov bu barədə ehtimalının olduğunu qeyd edib: “Yəqin ki, hər iki futbolçu “Bakı”ya qarşı səhv etdiklərini anlayıblar. Bu səbəbdən də bizə qarşı oynamamaq qərarına gəliblər. Təbii ki, bu, mənim ehtimalımdır. Dəqiq səbəb haqda məlumatsızam”.