Yılmaz Vural: “Foqtsa yaradılan şəraiti mənə yaratsınlar, daha yaxşı nəticə verim” EKSKLÜZİV

Milli komandamızın baş məşqçi postuna namizəd olan, tanınmış türkiyəli mütəxəssis Yılmaz Vural Futbolxeber.az saytına müsahibə verib.

- Adınız milli komandamızın baş məşqçi postuna namizədlər arasındadır. Bu haqda nə deyə bilərsiniz?

- Azərbaycan millisinə namizəd olmaq mənim üçün çox xoşdur. Bu haqda Türkiyə mətbuatına da açıqlama vermişəm. Mənə AFFA-dan hələ ki rəsmi təklif gəlməyib. Amma namizədlər arasında adım var. Dünən sizin Gənclər və İdman Naziri Azad Rəhimov da İstanbuldaydı. Bu haqda jurnalistlər ona da sual verdilər. O da “yox” demədi. Azərbaycan bizim üçün doğma ölkədir. Qardaş ölkənin futboluna fayda verməyi mən də istərəm. Biz Azərbaycanda özümüzü əcnəbi kimi hiss etmirik. Eynən də azərbaycanlılar Türkiyədə qonaq deyillər. Dilimiz, dinimiz, adət-ənələrimiz eynidir. Məni bu posta layiq bilsələr, Azərbaycan futbolunun inkişafı üçün əlimdən gələni edərəm.

- Bəlkə AFFA nümayəndələri sizin deyil, menecerinizlə əlaqə qurublar?

- Mən hər zaman çalışıram öz işimi özüm görüm. Yılmaz Vuralı tapmaq elə də çətin deyil. Siz nömrəmi tapıb, mənə zəng vurmusunuzsa, deməli AFFA rəsmiləri də bunu asanlıqla edə bilərlər.

- Milli komandamızın indiki durumundan xəbəriniz var?

- Əlbəttə, xəbərim var. Bilirəm ki, Avro-2016-nın seçmə mərhələsində komandanız keçirdiyi 4 oyunun hamısında məğlub olub. Bu gün Avropada seçmə mərhələdə xala həsrət qalan 3 yığma var ki, onlardan da biri Azərbaycan millisidir. Bu nəticə çox təəssüfləndiricidir. Çünki bilirəm ki, Azərbaycanda futbola böyük diqqət və qayğı var. Yığma komandanın uğur qazanması üçün hər cür şərait yaradılıb. Eyni problem bu gün Türkiyədə də var. Hər iki ölkədə maliyyə şərtləri çox gözəldir, hər cür şərait mövcuddur. Amma milli komanda azarkeşləri məyus edir. Hər bir vəziyyətdən çıxış yolu var. Bizim də müəyyən planlarımız var. Onları həyata keçirməklə uğur qazana bilərik.

- Ümumi olaraq Azərbaycan futbolu haqda hansı məlumatlara sahibsiniz?

- Desəm ki, bütün günü Azərbaycan futbolunu izləyirəm, düzgün olmaz. Amma tam xəbərsizəm demək olmaz. Mütəmadi olaraq futbolunuzla maraqlanıram. Azərbaycanda çalışan türkiyəli mütəxəssislərdən xəbərdaram. Türkiyədə Superliqada olmasa da, birinci liqada çıxış edən azərbaycanlı futbolçular var. Həmçinin Azərbaycan pasportuna sahib olan, yığmada çıxış edən türkiyəlilər var. Azərbaycan futbolu bizim üçün tanışdır. Orada dostlarımız var. Kifayət qədər məlumata malikəm.

- Daha əvvəl Azərbaycandan hər hansı bir təklif almısınız?

- Biz Azərbaycan futbolunu Mübariz Mənsimova görə tanımışıq. O, çox dəyər verdiyimiz, hörmət etdiyimiz bir şəxsdir. Türkiyədə çox böyük işlər görür. Mübariz bəylə çox gözəl münasibətlərimiz var. Bir neçə dəfə onun sahibi olduğu klubla bağlı söhbətimiz olub. Lakin qismət olmadığından Azərbaycanda çalışmağım hələ ki alınmayıb.

- Sizdən əvvəl millimizi Berti Foqts çalışdırırdı. Onun fəaliyyəti birmənalı qarşılanmadı. Yılmaz Vural hansı keyfiyyətlərinə görə Berti Foqtsdan daha üstündür?

- Özümü tərifləməyi xoşlamıram. Amma ilk növbədə onu vurğulayım ki, mən türkiyəli olsam da, futbol təhsilimi Almaniyada almışam. Hətta alman pasportum da var. Yəni, sıradan bir məşqçi deyiləm. Karyeram var, bir çox klublarda çalışmışam. Özümü Foqtsdan zəif saymıram.

- Azərbaycan millisini çətin vəziyyətdən çıxarda biləcəyinizə inanırsınız?

- Əlbəttə. Foqtsa yaradılan şəraiti mənə yaratsınlar, ondan da yaxşı nəticə verim. İddialı məşqçiyəm, özümə də güvənirəm. Boş-boş danışmağı da sevmirəm. Hər zaman sözümü gördüyüm işlə demişəm.

- Azərbaycanda sizin təyinatınızın tərəfdarı olanlar kimi, buna qarşı çıxanlar da var. Həmin şəxslərin əsas arqumenti odur ki, Yılmaz Vural heç vaxt İstanbul nəhənglərini çalışdırmayıb...

- Hər kəsin fikrinə hörmətlə yanaşıram. Mənim haqqımda məlumatı az olanlar şəxsi saytıma daxil olub, karyeramla maraqlana bilərlər. Bəli, İstanbul klublarını çalışdırmamışam. Amma Türkiyədə xeyli klubun baş məşqçisi olmuşam. Baş məşqçi qismində 696 oyuna çıxmışam. Bu, Türkiyədə rekord göstəricidir. Heç bir məşqçi mənim qədər meydana komanda çıxarmayıb. Bunları özümü tərifləmək üçün demirəm. Bu, faktdır. İstanbul klubunu çalışdırmağa gəldikdə isə bu, tək məndən asılı olan məsələ deyil. Bu klublarda tam fərqli sistem var. “Qalatasaray”a, “Fənərbaxça”ya, “Beşiktaş”a yaxın düşmək heç də asan deyil. Amma burada sıravi azarkeşlər arasında “komandada hansı məşqçini görmək istərdiniz” deyərək, sorğu keçirsəniz, onların böyük hissəsi “Yılmaz Vural” cavabını verəcək. Türkiyəni Avropada çox az məşqçi təmsil edir. Eyni problem Azərbaycanda da var. Bu isə ondan irəli gəlir ki, təbliğatımız güclü deyil.

- Sizi nə vaxt Bakıda görəcəyik?

- Bu, tək məndən asılı deyil. Amma bildiyim qədəri ilə Azərbaycan milli komandasının yeni baş məşqçisinin adı bu həftə bilinəcək. Bu məsələ qarşıdakı günlərdə həll olunacaq. AFFA seçimini etmək üzrədi. Həmin məşqçinin mən olub-olmayacağını deyə bilmərəm. Amma böyük ehtimalla, yeni məşqçinin adı qarşıdakı 2-3 gündə bilinəcək.