"Barselona"nın düşərgəsi Bakıda fəaliyyətə başlayır

Ölkəmizdə ilk dəfə olaraq, İspaniyanın "Barselona" klubunun düşərgəsi Bakıda  fəaliyyətə başlayacaq. Futbolxeber.az-ın Qol.az-a istinadən verdiyi məlumata görə, düşərgə "İnter" klubunun nəzdində, "İnter Arena"da (Şəfa stadionu) açılacaq. Fiziki hazırlığından asılı olmayaraq, 6-16 yaş arasında istənilən uşaq "Barselona"nın düşərgəsində iştirak edə biləcək.

Düşərgənin açılış mərasimi və mətbuat konfransı noyabrın 17-i, saat 15:00-da "İnter Arena"da keçiriləcək. Tədbirdə Barselona Futbol Klubu Akademiyasının koordinatoru Fredi Martin, məşqçilər Sergi Pi və Andreu Cerarols, həmçinin, "İnter"in vitse-prezidenti Müzəffər Novruzəliyev iştirak edəcək.

Qeyd etmək lazımdır ki, UEFA lisenziyalı bu məşqçilərin 15 ildən artıq məşqçi təcrübəsi, futbol üzrə magistr dərəcəsi vardır. Konfransda qonaqlar Azərbaycanda "Barselona"nın düşərgəsi haqda danışıb, jurnalistlərin suallarını cavablandıracaq və bu  layihə haqda ətraflı məlumat verəcəklər.