"Simurq" liderlə oyunun hazırlığına başladı

Dünən "Qəbələ" ilə görüşdə vacib qələbə qazanan "Simurq" ara vermədən "Neftçi" ilə oyunun hazırlıqlarına başlayıb. Futbolxeber.az-ın məlumatına görə, bu gün səhər saatlarında çalışmalara start verən sarı-qaraları əvvəlcə baş məşqçi Georgi Çixradze ətrafına yığaraq ənənəvi söhbət edib, bir daha qələbə münasibətilə təbrik edib və tapşırıqlarını verib. Daha sonra futbolçular iki qrupa bölünərək hazırlıqlara başlayıb. Əsas heyətdə meydana çıxanlar yüngül qaçış və isinmə hərəkətləri ilə məşqi tamamlayaraq istirahətə çəkilib. Digərləri isə fiziki hazırlıq üzrə məşqçi Aleksandr Karakliçin rəhbərliyi altında müxtəlif tapşırıqları yerinə yetiriblər. Sonda isə iki qrupa bölünərək ikitərəfli futbol oynayıblar. Dünən ikinci qolda zədələnərək məcburi əvəzlənən oyunun qəhrəmanı Nicat Qurbanovda bu günkü hazırlıqda iştirak edib.   

 

Qeyd edək ki, komanda növbəti turda "Neftçi"nin qonağı olacaq. Bu görüşdə sarı vərəqə limitini keçən İlkin Qırtımov forma geyinə bilməyəcək. Onunla yanaşı Nicat Qurbanov və Eyyub Əliyevdə paytaxt klubundan icarə əsasında heyətə qatıldığından müqavilə şərtlərinə uyğun olaraq meydana çıxa bilməyəcək.