“Bakı” bu qələbə ilə “çempionatda biz də varıq” dedi” (Müsahibə)

“Bakı”nın baş məşqçisi İbrahim Uzunca “Neftçi” ilə oyundan sonra (4:1) Futbolxeber.az saytına müsahibə verib.

- Komandanız “Neftçi” üzərində böyükhesablı qələbə qazandı. Qarşılaşma barədə nə deyə bilərsiniz?

- Yoldaşlıq görüşü idi. Arif Əsədov çox dəyər verdiyim bir mütəxəssisdi. Yoxlama oyunlarında üz-üzə gəlirik. Onlara çempionat matçlarında uğurlar arzulayıram. Qarşılaşma bizim üçün çox faydalı oldu. Gözəl oyunla qalib gəldik. Komandamı təbrik edirəm. Bu qələbə bir daha “Bakı”nın düzgün yolda olduğunu göstərdi. Komandam bir növ bu qələbə ilə “çempionatda biz də varıq” dedi.

- Risto Ristoviç və Lukar Mario Horvatın bu gün ayrıca məşq etməsinin səbəbi nədir?

- Onlar yalnız bu gün komandaya qoşulublar. Fasilə zamanı vətənlərinə yollanmışdılar. Yorğun idilər. Buna görə də ayrı çalışdılar.

- Müəyyən problemlər qarşılığında komandanı motivasiya etmək çətin olmur ki?

- Sevindirici məqam odur ki, yavaş-yavaş bütün məsələlər yoluna düşür. Hafiz Məmmədov hər zaman klubun arxasındadır. Gələcəkdə vəziyyətimiz daha da yaxşı olacaq. Çətinlikləri dərd etmirik. Çünki bu cür sıxıntılar istənilən klubda ola bilər.

- “Bakı”nın sərgilədiyi gözəl oyun problemlərin daha erkən həll olunmasına gətirib çıxara bilər?

- Təbii ki, hər şey yoluna düşdükcə bu da təsir edəcək. Komanda inanır. Çətin günlərdə biz Hafiz bəyi yalnız buraxa bilməzdik. “Bakı”da hər kəs vəziyyətin düzələcəyinə ümid edir. Hətta buna əminik. Biz sona kimi mübarizəmizi aparacağıq. Digər məsələlər də özlüyündə düzələcək.

- “Bakı” ilə lider arasında xal fərqi elə də çox deyil. Bu məqam komandanın çıxışına nə dərəcədə təsir edir?

- Bizi liderlər qrupundan cəmi 2 qələbə ayırır. Sabah, birisigün problemlərimiz yoluna qoyulanda, hədəfimiz daha yuxarı pillələrə yüksəlmək olacaq.  

- İlin sonuna kimi “Bakı” hansı mövqedə qərarlaşmağı planlaşdırır?

- İli altıncı və ya beşinci pillədə bitirsək, əla olar. Bu halda mübarizədən qopmayacağıq.

- Qarşıda “Bakı”nı çempionatda “Qarabağ”la oyun gözləyir. Bu qarşılaşma haqda hansı fikirdəsiniz?

- Həmin görüşə çox ciddi hazırlaşacağıq. Rəqib çox güclüdür. Bunu hər birimiz bilirik. Amma təslim olmaq fikrində deyilik. Sona kimi mübarizə aparacağıq. Çalışacağıq ki, “Qarabağ”dan xal və ya xallar alaq.