AFFA da Demençukun hansı kluba baxışa gəlməsindən xəbərsizdi

21 yaşadək futbolçulardan ibarət milli komandamızın əsas yığmaya qarşı keçirdiyi yoxlama oyununda meydana çıxan Mixail Demençukun hansı Azərbaycan klubuna baxışa gəlməsindən AFFA da xəbərsizdir. Qurumun İnformasiya və İctimaiyyətlə Əlaqələr Departamentinin rəhbəri Mikayıl Nərimanoğlu Futbolxeber.az saytına verdiyi açıqlama deyib: “Məndə bu haqda informasiya yoxdur. Ukraynalı futbolçunun hansı kluba baxışa gəlməsindən xəbərsizəm. U-21 hazırda ölkə xaricində olduğundan onlardan nəsə məlumat öyrənə bilmirik. Komandanın məşqçiləri Bakıya qayıtdıqdan sonra bu məsələni aydınlaşdıracağıq”.

Xatırladaq ki, əsas milli ilə yoxlama oyunundan sonra U-21-in baş məşqçisi Bernhard Lippert jurnalistlərə verdiyi açıqlamada “Həmin futbolçu mənə azərbaycanlı kimi təqdim edilib. Məsələ haqda dəqiq məlumatım yoxdur. Bildiyim qədəri ilə hansısa kluba baxışa gəlib. Amma hansı klub olduğundan da məlumatsızam” deyib.

Futbolxeber.az saytı 2 gün əvvəl Premyer Liqa klublarına soğru göndərsə də, bütün klublar belə bir futbolçunun baxışda olmadığını bildiriblər.